Раённы бацькоўскі сход прайшоў у СШ № 1 г. Ашмяны

Тэма чарговага бацькоўскага сходу - »Бяспечнае дзяцінства: як выявіць і спыніць гвалт над дзіцем". Раённы бацькоўскі форум прайшоў у рамках рэспубліканскай акцыі»Дом без гвалту". На сходзе быў узняты пласт праблем, якія тычацца гвалту бацькоў у адносінах адзін да аднаго, дарослых у адносінах да дзяцей, у асяроддзі падлеткаў. Разгледжаны псіхалагічныя, педагагічныя, медыцынскія, прававыя аспекты праблемы, прапанаваны варыянты дапамогі пацярпелым ад таго ці іншага віду гвалту. У зале прысутнічалі бацькі, кіраўнікі і педагогі ўстаноў адукацыі, педагогі-псіхолагі. Размова прайшла з удзелам намесніка старшыні камісіі па справах непаўналетніх Валянціны Яўташук, начальніка ўпраўлення адукацыі Ашмянскага райвыканкама Святланы Баркоўскай, старшага інспектара прафілактыкі Ашмянскага РАУС Сяргея Гіруця, урача-педыятра Ашмянскай ЦРБ Святланы Лісоўскай, псіхолага тэрытарыяльнага цэнтра сацыяльнага абслугоўвання насельніцтва Алесі Карповіч, благачыннага Ашмянскай царкоўнай акругі настаяцеля храма Уваскрэсення Хрыстова г.Ашмяны Георгія Муха. Педагогі-псіхолагі ўстаноў адукацыі правялі з бацькамі практычныя заняткі на тэму ўсвядомленага бацькоўства.  Бо, на жаль, не ва ўсіх сем'ях нараджэнне дзіцяці з'яўляецца доўгачаканым і безумоўным шчасцем. Дзесьці дзіцяці не чакаюць, хтосьці з бацькоў лічыць, што галоўны клопат – забяспечыць дзяцей матэрыяльнымі выгодамі, а выхаваннем хай займаюцца іншыя. А многія бацькі проста не валодаюць дастатковымі ведамі і таму дапускаюць прамашкі ў выхаванні дзяцей. Благачынны Ашмянскай царкоўнай акругі Георгій Муха падкрэсліў, што падчас вянчання ў праваслаўі над жаніхом і нявестай трымаюць карону, якая мае глыбокі сэнс. Гэта не толькі царскае ўпрыгожванне, але і сімвал пакутніцкага вянка. Бо сямейнае жыццё-гэта не толькі бясхмарнае шчасце і радасць, гэта і сумесныя цяжкасці, і пастаянная праца над сабой, і пастаяннае ўзаемнае служэнне іншаму чалавеку. Гвалт прысутнічае там, дзе адзін хоча ў што б там ні стала даказаць іншаму, што яго інтарэсы і патрэбы важней, даказаць сваю значнасць. У сям'і, дзе жывуць любоў і павага да іншага чалавека, усе праблемы вырашальныя.