У Ашмянскім раёне ўшаноўвалі чарговых лідараў уборачнай кампаніі

Жніво ў Ашмянскім раёне перасягнула экватар-збожжавыя ўбраны з больш чым 50 працэнтаў плошчаў. Уборку спрыяе добрае надвор'е. Кожны пагодны дзень у гэтую пару на вагу золата. Вось і імкнуцца аграрыі, каб убраць ураджай у тэрмін і без страт. З пачатку ўборачнай кампаніі ў раёне вызначыліся чатыры тысячнікі-вадзіцелі, якія вывезлі з поля ў засекі сваіх гаспадарак па тысячы тон збожжа. А пасля гарачых ва ўсіх адносінах выхадных у раёне ўшаноўвалі і тысячнікаў-камбайнераў, і чарговых лідараў-вадзіцеляў. Разам са старшынёй раённага выканаўчага камітэта Уладзіславам Гершгорыным, намеснікам старшыні раённага Савета дэпутатаў, старшынёй райкама прафсаюза работнікаў АПК Раісай Турлай накіроўваемся ў КСУП «Гальшаны». Доўгачаканая тысяча тон новага ўраджаю на рахунку ў старэйшага камбайнера Пятра Пазнанскага і яго памочніка Івана Базыка, якія працуюць на камбайне «Лексіён 560». Для Гальшанскага камбайнерскага экіпажа гэта далёка не першае жніво, як і не першая тысяча – ужо некалькі гадоў запар яны ў ліку лідараў, – але прымаць віншаванні ад кіраўніка раёна заўсёды прыемна, як і чуць словы падзякі за нялёгкую самаадданую працу. Да віншаванняў далучаюцца старшыня райкама прафсаюза работнікаў АПК Раіса Турлай і кіраўнік гаспадаркі Міхаіл Скаржынскі. Разам з удзячнасцю райкама прафсаюза работнікаў АПК Раіса Мікалаеўна ўручае дыплом Гродзенскай абласнога камітэта галіновага прафсаюза. Чарговыя тысячнікі чакаюць нас у КРСУП «Эксперыментальная база «Баруны». Тут на новым камбайне «Гомсельмаша» працуе Уладзімір Казлоўскі. Працуе адзін, без памочніка, але гэта не перашкодзіла яму дамагчыся лідарства на жніве і паказаць, на што здольная беларуская тэхніка. На адвозцы збожжа ад камбайнаў заняты ў гаспадарцы родны брат Уладзіміра Віталь. Сёння віншаванні, грашовыя сертыфікаты і кветкі ад кіраўніцтва раёна прымаў і ён, бо стаў у раёне чарговым кіроўцам-тысячнікам. Віншаванні ў гэты дзень ад кіраўніцтва раёна прымалі яшчэ два кіроўцы эксперыментальнай базы» Баруны", якія перасягнулі тысячны рубеж — Аляксандр Прыдатскі і Генадзь Кавалеўскі. З дасягненнем высокіх вынікаў на ўборцы збожжавых вадзіцеляў павіншавалі таксама намеснік дырэктара па ідэалагічнай рабоце КРСУП «Эксперыментальная база» Баруны " Валянцін Людкоўскі і прафсаюзны лідар гаспадаркі Марыя Ілюковіч.